الأدب : العلم المرقع محمد كان فى الصف الخامس الابتدائى وكان الضرب وقتها شغال على ودنه فى فلسطين والعراق ومصر نايمة في سريرها لا تتحرك وإحنا لازم نحركها "على حد تعبيره"! فى طابور المدرسة محمد هو الوحيد بين الطلاب الذي يرفع رأسه عاليا وينظر للعلم بشغف ويصرخ

العلم المرقع
محمد كان فى الصف الخامس الابتدائى وكان الضرب وقتها شغال على ودنه فى فلسطين والعراق ومصر نايمة في سريرها لا تتحرك وإحنا لازم نحركها "على حد تعبيره"!
فى طابور المدرسة محمد هو الوحيد بين الطلاب الذي يرفع رأسه عاليا وينظر للعلم بشغف ويصرخ بعلو صوته "تحيا مصر" وتشعر وقتها أن عروقه "هتنط منه"، ويسبب أزمة كبيرة جدا إذا تكلم أحد أثناء تحية العلم.
يغضب محمد كثيرا إذا رأى العلم ساكناً لا يرفرف، ويظل يؤكد فى نفسه أن هذه مؤامرة على مصر، وأن مدير المدرسة "مش راجل وطني" ويشارك في تلك المؤامرة والدليل أنه لم يقم بتغيير العلم الذي أصابه من التلف "والرقع" ما لا يرضى أفقر ترزي في مصر، كما أنه لا يقوم بتحية العلم والدليل الأقوى في وجهة نظر محمد لإدانة ذلك المدير المتآمر "أنه بيهرش" أثناء تحية العلم المقدسة ولا يقف انتباه.
الجميل أن المناضل الثوري الصغير كان شغوف بالحديث السياسي لوالده وينتظر الصباح ويسرع لينقل ذلك لأصدقائه، "ويتمنظر" عليهم ويتقمص دور سمير غانم فى فيلمه زواج على الطريقة الحديثة، ويقول: "أنا أصللي قرأت الكلام ده في كتاب "......." و"امبارح الجرنان كان بيقول كذا"..!


اللي فات كوم والباقي كوم تاني!!
في الفصل نظر مدحت "طالب عادي" إلى محمد وهو يقوم بتمزيق كشكول فاضي ويكتب بخط كبير جدا في كل ورقة، وبعد ذلك يقوم بوضع كل ورقة داخل درج من أدراج الفصل، الأخ مدحت اعتقد أنه جواب غرامي أو مقلب وذهب يسأل محمد "هو أنت بتعمل إيه"؟! وعلى طريقة الأفلام القديمة "يخبط محمد بيده على جبهته قائلا "أخ" أنت شوفتنى!!
وفي الفسحة وفى ملعب المدرسة الرملي جلس الأخ المناضل مع صديقه العبقرى - فى نظره طبعا - لأنه كشفه وتحدث محمد بصوت منخفض جدا " بص يابنى أنا عاوز أعمل ثورة علشان نصلح حال البلد، وامبارح بالليل فكرت في الموضوع ده ولقيت إنه سهل جدا !
**مدحت: طيب هتجيب سلاح منين يا ناصح !!؟
*محمد: يا عم سلاح إيه.. الحكاية مش كده خالص إحنا هنعمل حاجة زى سعد زغلول.. بابا كان بيقول إن أيام الراجل ده كان فى ثورة من غير سلاح يعنى شوية ناس اتجمعوا مع بعض علشان خاطر البلد
**مدحت: شوية ناس قد إيه؟
** محمد: بالضبط 100 واحد مثلا ! طيب وهنجيبهم منين !!
*محمد: إنت عبيط يابنى دى أسهل حاجة فى الموضوع أكيد الناس كلها زعلانة جدا بس مستنية حد يتكلم وأول ما أى حد يهتف هيتجمعوا حواليه وتبدأ الثورة.
**مدحت: طيب إحنا لسة صغيرين ومحتاجين ناس كبيرة!!
*محمد: قولى بقى كده.. أنت جبان ! بص يابنى أنا عاوز كشكول أو اتنين وأقلام "فلوماستر" ونكتب فى كل ورقة بخط كبير " تحيا مصر تعيش مصر" "المسجد الأقصى يموت" " انقذوا فلسطين" وحاجات زى دى!


ونوزع الورق على كل العيال فى المدرسة.. على طول هيحسوا ونتجمع و"تشيلنى" فوق كتفك ونهتف وأول ما صوتنا يبقى عالى المدرسة اللى جنبنا هتيجى معانا ونبقى كتير أوى وبعدين يتجمع بتوع المدرسة الإعدادى والثانوى ونخرج على الشارع وأول ما الناس الكبيرة تشوفنا هتغير مننا وهيجتمعوا حوالينا ونعمل ثورة كبيرة .. شوفت العملية سهلة ازاى !!
هى الثورة ..إمتى!
** مدحت: طيب وبعد كده هيحصل إيه!؟
*محمد: أنا.... مش عارف ! بس أهم حاجة يحصل ثورة !


ووافق مدحت وأعطى لمحمد كشكول فاضى وبدأ يكتب ويوزع الورق على أدراج الفصول وكل يوم يقف فى تحية العلم انتباه وينظر للعلم القديم ويحلم بالثورة " اللى هو مش عارف بعدها بيحصل إيه" واليوم الذى يتم فيه تغير العلم المقطوع بأخر جديد "لانج".


وبعدما انتهى ورق الكشكول انتظر محمد تحرك الناس أو سماع صوتهم ولكن ذلك لم يحدث بل حدث ان وجد أحد الأوراق التى كتبها بخط يده ملقاة في الزبالة.. وعندما علم بعض أصدقائه أشبعوه" تريقه" فبكى كثيرا وشعر بسذاجته.. إلا أن أحلامه عاودته مرة أخرى الطابور المدرسي وأول نظرة للعلم المقطوع " المرقع"..


وبعد مرور 13 سنة يقول محمد : لم أستطع أن أفعل مثلها في الجامعة مازالت أتسائل لماذا لم يتحرك الناس رغم أنى أعتقد أنني نفذت الخطة بدقه ؟ لماذا لم تقوم الثورة ؟ .. حد فيكم يقدر يجاوبنى ويقول لي الناس ساكتة ليه.؟ وخطتي فشلت ليه؟!
===================
المصدر : موقع عشرينيات